Որտե՞ղ պատվիրել կայք

Ինչպե՞ս ընտրել ծրագրավորողին քմահաճույքներով լի it աշխարհում։ Առաջին քայլով համադրեք և համեմատեք թեկնածու ստուդիաների ծառայություններում ներառվող առաջարկները, գները, կատարած աշխատանքների որակը և պատվիրատուների արձագանքները։ 

• Ցավոք, քիչ չեն դեպքերը, երբ կատարողը հնչեցնելով «շատ հարմար» գին, նախագիծը պատրաստում է սեփական ընկալման շրջանակներում՝ ձեռքի տակ եղած թեմփլեյթների և պատրաստի CMS-ների վրա։ Այնպես որ, ստանդարտ կոմերցիոն առաջարկի փոխարեն պահանջեք ձեր բիզնես մոդելի հիման վրա կազմած տեխնիկական հակիրճ նկարագիր գնացուցակով։
• Առաջնորդվելով վեբ ստուդիայի հրապարակած պորտֆոլիոյով՝ զրուցեք նախկին պատվիրատուների հետ։ Լսեք արձագանքները, հաշվի առեք ուժեղ և թույլ կողմերը։ Հավատացեք, մի քանի զանգը երբեմն փրկում է մի քանի միլիոնի կորստից։
• Անպայման անձամբ շփվեք ապագա գործընկեր կազմակերպությունների ղեկավարների հետ։ Վաճառքի մենեջերի պարտականություններն ավարտվում են պայմանագիրը կնքելուց հետո։ Դուք պետք է վստահ լինեք, որ կանխավճարը ստանալուց հետո ձեզ ամիսներով չեն ստիպելու զղչալ կատարած ընտրության համար, հնարավոր ֆորս մաժորների դեպքում էլ՝ ընդունելու են սխալները և միջոցներ ձեռնարկելու դրանք ցանկացած գնով ուղղելու համար։
• Համագործակցության մասին բոլոր պայմանները, դետալները, խոստումները ֆիքսեք նամակագրության միջոցով, պահպանեք դրանք գոնե մինչև պատվերի հանձնումը։ Միշտ ճշտեք սպասվող ծախսերի մասին, բարձրացրեք կատարած աշխատանքում՝ երրորդ կողմի հեղինակային իրավունքը չխախտելու պահանջը։ Ուշադիր եղեք պայմանագիրը և կից հավելվածներն ընթերցելիս, հատկապես, եթե դրանք գրված են մանր տառերով։
• Ծավալուն նախագծերի պարագայում և աշխատանքը, և վարձատրությունը բաժանեք մասերի։ Անկախ ցանկացած պատճառաբանությունից և զեղչերի ծավալից՝ 100% կանխավճարի պահանջը ձեր համար պետք է լինի կարմիր լույս։

Երբ արդեն ընտրել եք գործընկերոջը, ֆիքսել պայմանները, կնքել պայմանագիրը, լավ արդյունք ստանալու համար տարբեր փուլերում պետք է մասնակցեք կայքի ստեղծման գործընթացին։ 

• Մասնակցեք դիզայնի ստեղծման և համաձայնեցման գործընթացին։ Ուսումնասիրեք ոլորտի լավագույն կայքերի դիզայնները և առաջադրեք միայն հստակ պահանջներ։ Միաժամանակ, լսեք դիզայների խորհուրդները։
• Պահպանեք հաստատված դիզայնի ֆայլերը՝ դրանք վերջնարդյունքի հետ համեմատելու համար։ Ամենագեղեցիկ դիզայնը կարելի է փչացնել ոչ ճիշտ ծրագրավորման հետևանքով։
• Նախնական տարբերակի պատրաստ լինելուց հետո անձամբ ուսումնասիրեք կայքը, եթե ժամանակ ունեք, մասնակցեք դրա ձևավորման պրոցեսին։
• Մինչև նախագծի հրապարակումը, խնդրեք ընկերներին և բարեկամներին թեստային միջավայրում ուսումնասիրել կայքը և ֆիքսել հանդիպող անհարմարությունները։ Ամենապրոֆեսիոնալ թիմն էլ կարող է ունենալ բացթողումներ։

Հոդվածը գրվել է 2014 թվականին և թարմացվել է 2024-ի հունիսին։ Եթե կարդացել եք մինչև վերջ, ներքևում կարող եք գնահատել ինֆորմացիայի օգտակարությունը։