գներ

Հրապարակել, թե՞ թաքցնել գները

Պատկերացրեք՝ սուպերմարկետում գնումների եք և նկատում եք, որ ամենուրեք գները բացակայում են: Ապրանքի գինն իմանալու համար ամեն անգամ ստիպված եք լինում դիմել աշխատակցին: Ոչ միայն ստիպված եք դիմել, այլև պետք է սպասեք մինչև նա մոտենա և ձեր ականջին շշնջա գինը, որպեսզի մյուս գնորդները չլսեն այն։

Աբսուրդի հասցնող երևակայություն է, չէ՞: Բայց նմանատիպ իրավիճակի ամեն օր ինտերնետում, սոցիալական ցանցերում հանդիպում են օգտատերերից շատերը: Ցանկանու՞մ ես էկզոտիկ հյութ համտեսել: Կայքում 40% զեղչ են խոստանում, միայն թե գինը օնլայն դիմումից հետո կարելի է իմանալ: Պետք է բարձրակարգ մարքեթոլոգ լինել զեղչ կիրառելու և միաժամանակ արտադրանքի գինը թաքցնելու համար: 

Ֆեյսբուքյան խմբերից մեկում հետքրքրված եք տեղական արտադրանքո՞վ։ Ձեզ, որպես տարվա լավագույն հավանական գնորդի կստիպեն մեկնաբանություններում «+» նշան դնել և սպասել, որպեսզի օպերատորը մեսենջերով անհատապես հնչեցնի ապրանքի գինը։ Հոգ չէ, որ նման «+»-ի նշանները հարյուրավոր են և դուք կարող եք ընտրել ճիշտ ճանապարկը՝ գտնել ավելի քիչ գաղտնապահ վաճառողի։

Նույն իրավիճակն է գրեթե բոլոր ոլորտներում։ Կայքի պատրաստման գներից մինչև արծաթյա զարդեր և այլ ապրանքներ։

Թաքցրած գների առավելությունը

Սոցիալական ցանցերի զարգացման սկզբնական շրջանում ամեն ինչ թափանցիկ էր: Հետո հայտնվեցին մարքեթոլոգները, SMM մասնագետները, սկսեցին շրջանառել անծանոթ բառեր՝ «լիդ», «կոնվերսիա», «մարքեթինգ»․․․ ու համոզեցին նորաթուխ գործարարներին թաքցնել գները: Չէ որ այդ դեպքում ստիպված պետք է SMM մասնագետի դիմել, որն էլ կպատասխանի մեկնաբանություններին, կսպասարկի հաճախորդներին: Վարակը շատ ուժեղ էր, հիմնավորումը՝ համոզիչ։ Իբր սոց․ ցանցերի ալգորիթմը բարձր է գնահատում այն հրապարակումները, որոնք ունեն շատ մեկնաբանություններ, իսկ գնահարցումները հենց մեկնաբանություններում են լինում։ Իհարկե, սոց․ ցանցերի ալգորիթմները բարձր են գնահատում հետաքրքրություն առաջացնող հրապարակումները և ավել շատ մարդկանց մոտ են դրանք ցուցադրում շահեկան տեղերում։ Միայն թե այդ ալգորիթմները ավելի «խելացի են» որոշ մարկետոլոգներից և տարբերակում են իրական հետաքրքրությունը սպամային գնահատցումից կամ հարյուրավոր + նշաններից։

Ի՞նչ առավելություններ կարելի է ստանալ գները թաքցնելուց

  1. Սոցիալական ցանցերում գների բացակայությունը ստիպում է հետաքրքրված հաճախորդներին հարցեր տալ, մեկնաբանություններ թողնել գրառումների տակ: Կարծիք կա, որ ալգորիթմն այդ գրառումը համարում է օգտակար, բարձրացնում է դիտողականությունը: Կայքերում հայտերի ուղարկումը մեծացնում է կոնվերսիան:
  2. Եթե դուք ունեք տաղանդավոր վաճառքի մենեջեր, ապա արժի հավանական հաճախորդների մի մասին կորցնել գինը չհրապարակելու պատճառով, սակայն անհատական շփման ընթացքում արտադրանքը/ծառայությունը վաճառել մաքսիմալ բարձր գնով։
  3. Եթե դուք չունեք ուղիղ վաճառ կամ մատուցում եք «բարդ» ծառայություն, ապա թաքցրած գները կարող են արդարացված լինել:

Թաքցրած գների թերությունները

Անվիճելի է, որ գների գաղտնիությունը դրական ազդեցության հետ մեկտեղ առաջացնում է նաև բացասական էմոցիաներ: Այդ դեպքում ինչու՞ ենք մենք՝ որպես վաճառող, անում այն, ինչը կարող է բարկացնել գնորդին:

Թաքցրած գների թերություններն են՝

  1. «Բոլորն անում են, ես էլ եմ անում»։ Ցավոք, անել այնպես, ինչպես անում է մեծամասնությունը, գործարար մարդու դասական սխալներից է: Այդ սխալի պատճառով հավանական գնորդների մեծ մասը պարզապես կանցնի ձեր առաջարկի մոտով:
  2. «Իմ արտադրանքը «բարձր հասարակության» համար է, մինչև գնորդն անձամբ չտեսնի որակը, գինը կշարունակի վախեցնել նրան»: Այս արդարացումից հետո ինչ-որ տեղ սննկանում է էլիտար զբոսանավեր արտադրող մի ընկերություն, որը բոլոր գները հրապարակել է կայքում:
  3. «Անձնական նամակով կամ հեռախոսով ավելի հեշտ է բացատրել առավելությունները և կարելի է ավելի շատ վաճառել»: Մեծ մասամբ այդպես ասում են այն մարդիկ, որոնք «վաճառք» հասկացության տակ ընդունում են ոսկե լեռների կեղծ խոստումները և անգամ չեն լսել SPIN տեխնոլոգիաների մասին:

Կանոնները խախտելու սովորություն

Ամեն դեպքում, ի՞նչն է ստիպում գործարարին խախտել կանոնները, սովորություն դարձնել այն, ինչը իրեն դուր չէր գա որպես հաճախորդ։ Կանոնները խախտելու սովորությունն ունի և «գիտական», և առօրեական հիմնավորումներ՝

  • Նոր արտադրանքի դեպքում տարածված սովորություն է հնչեցնել գերագնահատված գինը, մի քանի օր անց զեղչ հայտարարել և հասցնել նորմալ արժեքին:
  • Կա ևս մեկ անարդար քայլ՝ տարբեր գնորդների համար տարբեր գներ հնչեցնել: Կամ ինչպես ասում են՝ դիմավորել հագուստով։ Սա ակտուալ է հատկապես ծառայությունների ոլորտում, որտեղ կարելի է արդարացնել ցանկացած գին։շ
  • Գաղտնի գների ավելի խորը, հոգեբանական պատճառը բարձր գնացուցակի պատճառով հաճախորդին կորցելու վախն է: Կատարողը հստակ գիտի, որ դեմպինգային գներով աշխատող մրցակիցների մոտ չկա փորձի և գիտելիքների համապատասխան բազա, վստահ է սեփական փորձի արժեքին, և որպեսզի մրցակցի կոշտ շուկայական պայմաններում, թաքցնում է իր գները՝ անձնական շփման ժամանակ գներն արդարացնելու հնարավորություն ստանալու համար:

Հրապարակել գները, թե ոչ, յուրաքանչյուր գործարարի անձնական ընտրությունն է: Սակայն փորձը ցույց է տալիս, որ հավանական գնորդը «զգում» է թափանցիկության ու արդար մրցակցության ազդանշանները:

Իմիջիայլոց, գործունեության հենց սկզբից՝ 2009 թվականից, անկախ տնտեսական վիճակից, ճգնաժամերից, դոլարի փոխարժեքից և մրցակիցների դեմպինգներից, Աստուդիո ընկերությունը միշտ հրապարակել է իր ծառայությունների գները։

Բլոգ

1344
Օգտակա՞ր էր այս հոդվածը